हॅंग ओव्हर

पार्टी संपली, रात्र सरली दुपारही टळली,
तरी हॅंग ओव्हर चालूच आहे

इवलेसे घर त्यात
देह दीड हात
मातीत मळलेले पंजे
आणि पाय आभाळात..
करुन करुन करणार काय
खाली डोके वर पाय
माझी नव्हती इच्छा अशी
खेळ दैवाचा दुसरं काय ..
दुपार झेलत झेलत
वाट पहाणं रात्रीची
कित्येक तास चालूच आहे ..

हाका.. हाका .. हाका..
हाका चारी दिशांनी ..
घर डोक्यावर घेतले आहे
घोंगावणा-या माशांनी
भिंतीवरचा बिग बी चिडतो
तो ही माझ्यावर ओरडतो
माझा घसा कोरडतो ..
मी कोप-यात बसून
रडतो ...
हे असेच
किती युगे चालू आहे ?

नाचरं आकाश, नाचते ही धरा
त्यांचा फक्त नाच, माझ्या घराला चिरा ..
घर आवरले जरी , कसे सावरू मन .
वा-याने उडू पाही जसे सुकले पान ..
मी त्याल पकडावे .. त्याने दूर उडावे ..
हेच चालू आहे .
..
तू यावं आणि लपून
तिनं बोलावं
हेच चालू आहे !

मी !

मी
थेंब दवाचा
मेघ नभाचा
उधळ मातीचा ... मी

मी
वास फुलांचा
पंख मोराचा
भास वनांचा .. मी

मी
जन्म रुतूंचा
ओघ नद्यांचा
शब्द सख्यांचा ... मी !

फेअरवेल

फेअरवेल फ़्रेन्ड
माझा रोल संपलाय.
माझ्या तुझ्या रस्त्याला
मागेच फाटा फुटलाय ..

तु दिलेल्या शब्दांची 

हास्याची, 

आसवांची, 

नजरेची
साठवण केलीय मनाच्या बरणीत..
कडु झाल मन.. 

नाहीच गेला वेळ
एखादी गोळी चघळीन त्यातली..
अडलेलं,चुकलेलं नक्की सुटेल गणित ..

नाहीतर चार गोळ्या
वाटीन एक दोघांना
निदान त्यांच गणित
तरी पक्क होईल

फेअरवेल फ़्रेन्ड, फेअरवेल ..
माझा रस्ता मला बोलावतोय
आत्ता धूसर असलेला चेहरा
बरोबर यायला खुणावतोय ..